A Galega renova as súas tardes cun espazo divertido e participativo presentado por Roberto Vilar e Rodrigo Vázquez, que contarán coa colaboración das reporteiras Rocío Barrio e Patricia Santana e do locutor da RG Marcial Mouzo
Santiago, 23.01.2020.- A TVG presenta este venres no estudio Tex 45 de Ordes o programa ‘Quen anda aí?’, un novo formato para as tardes, que, presentado por Roberto Vilar e Rodrigo Vázquez, achegará desde o vindeiro luns tres horas de directo, de conversas coa audiencia e de resposta ás cuestións que máis lles preocupan aos espectadores/as.
Nesta nova aposta da Galega para as tardes de luns a venres participarán tamén dúas profesionais moi coñecidas pola audiencia da TVG, Rocío Barrio e Patricia Santana, que serán as encargadas de conectar en directo desde distintos lugares da xeografía galega, e tamén o locutor da Radio Galega Marcial Mouzo, que unha vez por semana trasladará ao estudio o espírito do seu coñecido espazo radiofónico ‘Pensando en Ti’.
Producido por Veralia e Tex 45, ‘Quen anda aí?’ será unha porta aberta a todas as persoas que teñan algo que contar e compartir, amosando con historias cotiás coas que se identificarán os espectadores desde as súas casas.
Fuente Crtvg.es
