Santiago, 08.10.2021.- A Segunda RFEF de fútbol, o Mundial de Motocrós e varias citas do deporte feminino galego destacan esta fin de semana na oferta deportiva dos medios públicos galegos.
A primeira retransmisión en directo a través da G2 e da web da CRTVG será o Bergantiños C. F.-C. D. Móstoles, da sexta xornada de Segunda RFEF, que se ofrecerá o sábado ás 17.00 h. O equipo galego buscará neste encontro o primeiro triunfo do curso, xa que, tras cinco xornadas, aínda non coñece a vitoria. Tampouco foi fácil o comezo de temporada para o conxunto madrileño, que se mediu cos pesos pesados do Grupo I, pero que agora parece que atopou o seu xogo e, sobre todo, o camiño ao gol da man de Álvaro Sánchez, un xogador nun gran momento.
A continuación, ás 17.00 h, será a quenda da 1ª División RFEF feminina de fútbol sala, co derbi entre o Ourense Envialia F. S. F. e o Marín Futsal.
A mañá do domingo estará ocupada pola Segunda División de fútbol feminino. Ás 12.00 h comeza o partido R.C. Deportivo Abanca-Zaragoza C. F. F., correspondente á quinta xornada no grupo norte do Reto Iberdrola.
Xa pola tarde, a partir das 16.00 h, chegará a 12ª cita do Mundial de Motocrós, que continúa o seu maratón de outubro co MXGP de Francia, en Lacapelle-Marival. Alí daranse dita os mellores pilotos da especialidade, aínda que o galego Jorge Prado será dúbida ata o último momento despois da aparatosa caída que sufriu o domingo pasado en Alemaña en plena liña de meta. O esloveno Tim Gajser chega á cita liderando a clasificación con dous puntos de vantaxe sobre o seu inmediato perseguidor, o neerlandés Jeffrey Herlings.
Ás 17.00 h ofrecerase o derbi da Segunda RFEF entre o C. D. Arenteiro e a S. D. Compostela. Os brancos e azuis visitan un equipo que leva moitos meses demostrando unha enorme fiabilidade na cosa. A súa longa imbatibilidade como local fai deste encontro unha misión complicada para os da capital galega.
Ademais, a web da CRTVG emitirá en directo ás 17.00 h (en diferido, ás 19.00 h pola G2) o partido Coruxo F. C.-U. P. Langreo. Na última xornada, o Coruxo marchou da Lomba cos tres puntos tras adxudicarse a victoria pola mínima ante o Arousa (0-1), mentres que o Langreo empatou a 1 contra a Segoviana.
Fuente Crtvg.es
