Santiago, 03.07.2020.- Esta primeira fin de semana de xullo, os medios públicos galegos ofrecen en directo pola G2 o comezo da Eusko Label Liga e a Euskotren Liga de traiñeiras, que celebrarán as dúas primeiras xornadas da temporada na cidade da Coruña.
Debido ás consecuencias derivadas da pandemia da Covid-19, esta temporada non se poderá contar coa mesma cantidade de afeccionados que se achegaban aos peiraos, praias ou espigóns para apoiar aos dezaseis equipos que participan nestas competicións. Por iso, a segunda canle da TVG retransmitirá en directo as 18 probas do calendario da Eusko Label Liga e as 12 que compoñen a Euskotren Liga, para que os televidentes poidan seguir gozando das regatas unha temporada máis.
O sábado, a partir das 17:30 horas, dará comezo a liga feminina de remo, Euskotren Liga, coa IV Bandeira Cidade da Coruña. Ás 18:00 h, será a quenda da competición masculina, a Eusko Label Liga. A cidade herculina é a encargada de dar o bandeirazo de saída a esta nova temporada da liga de remo, en que Cabo e Ares conforman a representación galega na elite do remo.
A seguinte cita en directo terá lugar o domingo ás 11:30 horas, momento en que se disputará a segunda xornada da Euskotren Liga nas augas da Coruña. Pola súa parte, a da Eusko Label Liga comezará a partir das 12:00 h.
Fuente Crtvg.es
