Santiago, 11.03.2021.- Este venres principia o ‘Galicia en Goles’ da fin de semana co seguimento dos partidos Ensino Lugo-Cáceres, da liga de baloncesto feminino, e Burela-Osasuna, da liga de fútbol sala masculino. Ata as 00.00 h, Paco Santos analizará cos protagonistas a intensa xornada futbolística dos equipos galegos.
O sábado, desde 15.00 h, o protagonismo será para o Xirona-Lugo, da Segunda División A, e o Joventut-Obradoiro, da ACB de baloncesto. Ademais, o programa cubrirá o derbi local de fútbol sala feminino entre o Ourense e o Cidade das Burgas.
O domingo, o ‘Galicia en Goles’ durará doce horas. Desde as 11.00 h retransmitirá o histórico Celta B-Deportivo da Coruña, no campo de Barreiro, na penúltima xornada da Segunda División B. A partir das 14.00 h, o interese pasará por Balaídos co Celta-Athletic de Bilbao, da Primeira División. Pola tarde, o Pontevedra-Coruxo, da Segunda B, e a Terceira completarán a oferta de retransmisións. Cando dean as 20.30 h comezará o faladoiro de especialistas para analizar o sucedido durante a fin de semana nos terreos de xogo.
Durante a fin de semana, a Radio Galega ofrece outros espazos de temática deportiva. O sábado, ás 13.00 h, Alfonso Pardo visitará Cedeira para falar cos representantes do club de remo nunha nova edición de ‘Convivir Deportivo’. Ás 23.00 h, Rodrigo Pérez conducirá a revista de motor ‘Gas a Fondo’. Por último, Toni López resumirá no ‘Galicia en Toquio’, ás 23.30 h, a actividade dos deportistas galegos que apuran a preparación para os próximos Xogos Olímpicos.
O domingo, a última hora do día será protagonista en ‘Ao Contraataque’, coa mesa de debate liderada por Pedro Pablo Alonso para analizar o desenvolvido na fin de semana polo Celta, o Lugo e os equipos galegos da Segunda División B.
Fuente Crtvg.es
