O presentador Arturo Fernández proporá unha fermosa viaxe pola raíz do noso baile máis singular, amais de ensinar como se baila, guiado polo mestre Gustavo Couto
Santiago, 01.01.2020.- O ‘Inimitables’ (22.10 h) da TVG dálle a benvida a 2020 bailando ao son das gaitas, do bombo, do charrasco, a pandeireta e as cunchas de vieira, nos puntos, voltas ou paseos propios da muiñeira, o baile máis representativo de Galicia. O programa que presenta Arturo Fernández indagará esta noite nas características e na historia da danza máis singular do noso folclore tradicional. Pero, e os galegos, saben realmente bailala? que é un picado? e un tablón? ou que é un adiante atrás?
A esas preguntas responderá este ‘Inimitables’ dedicado á muiñeira. Un programa en que guiados polo mestre Gustavo Couto aprenderase a bailar ben unha muiñeira e, ademais, descubriranse moitos segredos deste baile. Como naceu? Onde se bailaba? Que ten que ver cos muíños? Cales son as muiñeiras máis coñecidas?
Este mércores á noite, ‘Inimitables’ proporá, pois, unha fermosa viaxe pola raíz do noso baile máis representativo: a muiñeira.
Fuente Crtvg.es