Santiago, 11.10.2021.- A reflexión e a conversa sosegada volven este luns á Televisión de Galicia co programa ‘As Luces’, que, presentado e dirixido por Xosé Carlos Caneiro, comeza unha nova temporada na G2.
O espazo volveralles dar a palabra a persoas populares e relevantes da sociedade galega para falar sobre diversos aspectos da vida, cuestións que non sobresaen entre os temas da actualidade no día a día, senón que forman parte da súa filosofía vital, como os soños, as aspiracións persoais e profesionais ou os fracasos.
Nesta primeira entrega, dialogarán fronte a fronte o xornalista Rodrigo Vázquez, presentador do programa da TVG ‘Quen Anda Aí?’ e recoñecido dúas veces co Premio Mestre Mateo a mellor comunicador de televisión, e a mestra e escritora Concha Blanco, que ten cativado varias xeracións de homes e mulleres que un día foron nenos e autora tamén de guías pedagóxicas referenciais para a educación galega.
De entrada, son dúas persoas distantes nas súas ocupacións e momentos vitais, pero con puntos en común nas súas maneiras de ver a vida. Ambos manterán unha conversa sobre cuestións polas que comparten interese e baseadas nas súas propias experiencias.
Pola súa parte, o escritor e xornalista Xosé Carlos Caneiro descubrirá facetas pouco coñecidas dos convidados, ao tempo que suscitará unha conversa con propósito divulgativo sobre os máis variados ámbitos de coñecemento.
Fuente Crtvg.es