Santiago, 19.01.2020.- No capítulo desta noite de ‘A Estiba’, despois de atopar o cadáver de Sara no maleteiro do coche, Antón decide tragar o seu orgullo e acode a César. Os dous irmáns Longueira finxen seguir levándose mal de cara á galería e mesmo chegan a provocar a detención de César. Todo forma parte dun plan. Na comisaría, César négase a declarar diante de Sofía: só falará con Manuela Fortes.
Pola súa parte, Cruz leva tempo dándolle voltas á detención de Caniche: non cre que estea detrás do atentado contra o alcalde. E cando se decata de que está a recibir presións para declararse culpable, Cruz decide investigar pola súa conta. A súa liña de traballo coincide coa de Manuela, que continúa detrás de Lionel, e chegan á conclusión de que o construtor está implicado no atentado de Marcos.
Manuela vese obrigada a poñer en espera a investigación de Lionel cando César a reclama e apunta a Estevo como responsable da morte de Xavier. Aínda que ao principio ninguén o cre, a cousa cambia cando atopan o cadáver de Sara no coche do tenente de alcalde. Temendo acabar na cadea, Estevo decide contalo todo e denunciar a Covas: el é o cerebro da trama de narcotráfico, ademais do asasino de Xavier e de Sara. A policía vai tras Covas, que na súa fuxida intenta vingarse dos Longueira, xa que sabe que eles están detrás da súa caída.
Mentres, o proxecto do porto de transatlánticos recibe luz verde definitiva e a construtora de Lionel está a piques de recibir os cartos das axudas municipais para a construción do centro comercial. Rosalía continúa sospeitando do seu xefe e intenta buscar as probas que confirmen que é un asasino, pero Lionel decátase. Sabe que a detención de Estevo precipitouno todo e pretende usar a Rosalía para meterlle presión a Marcos e fuxir cos cartos das axudas.
Fuente Crtvg.es
