Santiago, 23.01.2020.- O ‘Galicia en Goles’ dedica a edición do venres ao balonmán. Desde as 20:30 horas, Paco Santos conduce a retransmisión do partido da Liga feminina entre o Guardés e o Bera Bera, desde o pavillón da Sangriña. No programa tamén será protagonista a LEB Ouro de baloncesto, con seguimento aos partidos Cáceres-Marín e Castelló-COB Ourense.
O sábado, a partir das 15:00 h, Xoán Galán reparte xogo na liga de fútbol, con atención especial ao Huesca-Lugo, desde o Alcoraz. Na Segunda B destaca o Celta B-Las Rozas, en Barreiro. No polideportivo, o fútbol sala terá presenza coas ligas de Primeira e Segunda nas categorías masculina e feminina, ademais do balonmán masculino na división de prata e o baloncesto feminino en Lugo co Ensino-Guipúzkoa.
Xa o domingo, a edición matinal das 12:00 horas contará o Sporting B-Pontevedra, de Segunda B; o Pontellas-Polvorín, de Terceira; e o derby de balonmán masculino entre o Cisne de Pontevedra e o Novás do Rosal. A partir das 13:45 horas, toda a atención pasará polo fútbol de Primeira desde Balaídos co Celta-Eibar. En canto remate, comezará na Segunda o Albacete-Deportivo. O Racing-Coruxo, de Segunda B, a xornada de Terceira e os partidos de baloncesto Obradoiro-Valencia e Basket Coruña-Guipúzkoa completan a oferta da tarde. En canto remate o encontro do Sar, principiará o tempo de opinión dos expertos no ‘Faladoiro‘, que continuará ás 23:00 horas no ‘Contraataque’, as dúas emisións tamén en streaming no ‘Mira RG’ a través da web radiogalega.gal e os dispositivos móbiles.
Polo demais, o deporte da fin de semana terá presenza o sábado ás 13:00 h no ‘Convivir Deportivo’. Alfonso Pardo visita á Sociedade Deportiva Paradela. Desde a súa sede entrevistará a Diego López, o gardameta galego do Espanyol de Barcelona. Ás 23:00 horas, Rodrigo Pérez conduce a revista do motor ‘Gas a fondo’, mentres ás 23:30 horas Toni López completa a xornada deportiva entrevistando no ‘Galicia en Toquio’ a Víctor Castro, de halterofilia, e Xosé Cuba, deportista de loita.
Fuente Crtvg.es
