Santiago, 28.11.2019.- A fin de semana deportiva na Radio Galega principia o venres coa retransmisión do Celta-Valladolid, de Primeira División. Ás oito e media do serán, Paco Santos pon en marcha o ‘Galicia en goles’, con Roberto Carlos Carballo, Víctor López e Moncho Carnero situados en Balaídos. O programa prolongarase ata as doce da noite, para escoitar despois dos noventa minutos de xogo o adestrador Óscar García Yunyent e os futbolistas destacados que pasen pola zona mixta.
O sábado, ás tres, Xoán Galán dirixe a sesión de tarde, que estará centrada no Valencia-Obradoiro, da Liga ACB de baloncesto, desde o pavillón Fuente de San Luis. O Somozas-Ourense CF de fútbol e o Burela-Futsi Navalcarnero de fútbol sala son outros dous encontros destacados, xunto ao fútbol xuvenil, a Liga Española de Baloncesto e o balonmán.
O domingo, ás doce, a edición matinal pasará polo fútbol de Segunda B co Coruxo-Peña Deportiva e o Baleares-Celta B. A Liga feminina tamén terá protagonismo co Deportivo-Sevilla e o Friol-Osasuna, ademais da Copa de España de Ciclocross.
A partir das tres, a atención estará posta no derbi de Segunda División desde o Anxo Carro, onde Andrés Vieites e Javi Torres poñerán voz ao Lugo-Deportivo. O Racing-Marino e o Pontevedra-Langreo, de Segunda B, xunto á Liga de Terceira completarán a oferta da tarde.
Desde as oito e media do serán, Roberto Carlos Carballo, César Méndez e Xulián Suárez Fuentes serán os convidados do ‘Faladoiro’, o tempo de análise que dará paso ás once da noite á mesa de debate de ‘Ao contraataque’, baixo a dirección de Pedro Pablo Alonso. Estes dous espazos poderán velos a través do ‘streaming’ Mira RG na web da Radio Galega e na aplicación para o móbil.
A fin de semana tráenos tamén o ‘Convivir deportivo’ á unha da tarde desde Foz, para falar da travesía de piragüismo. Ás once da noite, Rodrigo Pérez conduce o programa do motor ‘Gas a fondo’ e desde as once e media Toni López conversa no ‘Galicia en Toquio’ cos deportistas galegos que aspiran a competir nos próximos Xogos Olímpicos.
Fuente Crtvg.es
