Oito centros educativos galegos gañan o IV Concurso de Podcasts Radio na Biblio, que conta coa colaboración da RG

0
25

Santiago, 16.05.2022.-   Oito centros educativos de toda Galicia resultaron gañadores do IV Concurso de Podcast Radio na Biblio, en que colabora a Radio Galega e cuxa resolución acaba de facer pública a Xunta de Galicia. O certame, destinado aos centros públicos non universitarios, premiou traballos realizados ao abeiro do programa Radio na Biblio e arredor da figura de Florencio Delgado Gurriarán, autor homenaxeado no Día das Letras Galegas 2022.

Na modalidade de infantil e primeiro e segundo ciclo de primaria, o premiado é ‘Poemas crioulos’, do CEIP Nicolás del Río (Cedeira). No caso da modalidade para alumnos de 3º a 6º de primaria, os gañadores son ‘Unha regueifa a don Florencio’, do CEIP Milladoiro (Malpica de Bergantiños); ‘A treboada de Corgomófilo’, do CEIP As Solanas-Nicolás Gutiérrez Campo (A Guarda); ‘De volta en volta’, do CEIP Manuel Rodríguez Sinde (A Guarda), e ‘A hora de Galicia’, do CEIP Dr. Fleming (Vigo).

Na categoría de alumnado de secundaria, o galardoado e ‘A heroica vida de Florencio’, do IES P. Rafael Dieste (A Coruña). E finalmente, na modalidade para estudantes de ensinanzas de bacharelato, de persoas adultas ou ciclos formativos, resultan premiados ‘Choiva ou pluie-Florencio Delgado Gurriarán’, do EOI da Coruña, e ‘Domadora de serpes’, do CEE Saladino Cortizo (Vigo).

Para participar neste certame os centros debían presentar traballos sonoros como entrevistas, cuñas publicitarias, noticiarios, faladoiros, debates ou programas monográficos, entre outros formatos, todos eles en lingua galega.

Os centros gañadores nas distintas modalidades recibirán unha asignación extraordinaria de 1.000 € para melloras no laboratorio de radio ou para actividades relacionadas co funcionamento do mesmo, sempre vinculado á biblioteca do centro. Así mesmo, poderán visitar as instalacións da Radio Galega en Santiago e os podcasts premiados serán emitidos pola emisora pública na Semana das Letras Galegas, entre o 17 e o 21 de maio. Á súa vez, difúndense a través da canle dixital do programa ‘Diario cultural’ (diariocultural.gal).

O obxectivo do certame é estimular, mediante o recoñecemento de boas experiencias, a elaboración de produtos radiofónicos, enfocados a salientar a valoración da lingua materna, reforzar a lectura de poesía galega ou o achegamento ao mundo da edición, da tradución e da cultura galega no exilio, do que era coñecedor Florencio Delgado Gurriarán.

Fuente Crtvg.es