‘Pequenos Fenómenos’ escollerá esta noite os outros catro nenos que disputarán a gran final da semana que vén

0
1

Santiago, 28.12.2019.-    A Televisión de Galicia ofrecerá este sábado a segunda semifinal do programa ‘Pequenos Fenómenos’, un concurso de música infantil, presentado por Xosé Manuel Piñeiro, en que 16 rapaces procedentes de toda Galicia competirán e sorprenderán a audiencia coas súas artes interpretativas.

Nesta segunda semifinal reproducirase a mecánica da primeira. Participarán outros oito nenos cantantes que interpretarán dúas cancións cada un. Entre eles escollerá o xurado outros catro finalistas, un xurado que esta vez estará formado polos artistas Davide Salvado, Eva Iglesias e Roko, que aproveitará a súa presenza no programa para presentarlles aos espectadores as súas novas propostas musicais.

Os ‘Pequenos Fenómenos’, uns auténticos valentes de menos de 12 anos, interpretarán en directo os temas que eles mesmos escolleron. Cunha serenidade sorprendente, converteranse nos auténticos protagonistas na Televisión de Galicia. Estarán acompañados polos seus pais e amigos e, coma os grandes artistas que son, deixarán o público absolutamente impresionado.

Nesta segunda entrega do especial de Nadal ‘Pequenos Fenómenos’, clasificaranse catro cativos, que o sábado que vén se enfrontarán aos outros catro que a semana pasada obtiveron o billete para a gran final. O cantante gañador obterá un premio de 2.000 euros e o segundo e terceiro clasificado, de 1.000 e 500 euros, respectivamente, que irán destinados á organización sen ánimo de lucro que eles mesmos escollan.

Fuente Crtvg.es