Emitirase en directo, desde o estudio 5 de San Marcos, ás 21.15 h, despois do ‘Telexornal serán’
Tamén poderá seguirse na web G24.gal, e, ás 22.30 h, en reemisión na G2 con intérprete en lingua de signos
Santiago de Compostela, 08.06.2022.- O presidente da Xunta de Galicia, Alfonso Rueda Valenzuela, será entrevistado este xoves na Televisión de Galicia. A partir das 21.15 h, despois do ‘Telexornal serán’, o redactor xefe dos informativos da canle pública, Marcos Sueiro, preguntará ao xefe do Executivo galego por asuntos clave da actualidade do país como a sanidade, o ensino, os servizos públicos e as infraestruturas.
Trátase da primeira entrevista televisiva que concede Alfonso Rueda desde que tomou posesión o pasado 14 de maio como presidente da Xunta de Galicia. Será en Televisión de Galicia onde responda polas primeiras decisións do seu goberno sobre os asuntos que máis interesan á cidadanía.
A entrevista emitirase a través da primeira canle da TVG. A partir dese momento, os espectadores poderán seguila de forma íntegra, e a calquera hora que desexen, a través da web G24.gal e a canle de YouTube. Ademais, a G2 (22.30 h) ofrecerá a entrevista con interpretación de signos (LSE) para as persoas xordas de Galicia.
Fuente Crtvg.es
