Santiago, 09.12.2020.- A TVG ofrece este mércores o derradeiro capítulo da serie documental ‘Os Castros’ (22.35 h), que estará dedicado integramente a contemplar e tratar de entender o imprescindible dos castros galaicos máis significativos e singulares da cultura castrexa. Nesta viaxe final, o espazo presentado por Alba Mancebo irá desde Baroña ata o Facho de Donón, dando a volta a Galicia.
A primeira ocupación dos castros galegos hai que situala entre os séculos IX e VIII antes de Cristo. Eses castros máis antigos eran polo xeral pequenos e estaban emprazados en outeiros. Pero a maioría dos castros escavados hoxe en Galicia, sobre todo os máis grandes, son de épocas máis tardías. Foron construídos en pleno florecemento da cultura castrexa, nos cinco séculos anteriores ao cambio de era e nalgún caso mesmo despois. Isto fai que sexan todos tan singulares e únicos.
Para comprobar in situ todos estes detalles, ‘Os Castros’ achegarase hoxe a Baroña (Porto do Son), Borneiro (Cabana de Bergantiños), Elviña (A Coruña), Viladonga (Castro de Rei), Cervantes, Castromaior (Portomarín), San Cibrao de Las (Punxín e San Amaro), Castromao (Celanova), Saceda (Cualedro), Santa Trega (A Guarda), Troña (Ponteareas) e Facho de Donón (Cangas).
Fuente Crtvg.es
