Santiago, 10.02.2023.- ‘Coa luz do corazón’ é o novo programa da TVG que comeza este sábado (20.10 h)e que presenta a oportunidade de coñecer outra realidade moi distinta á habitual: a realidade das persoas invidentes. Corina Mañá, cega de nacemento, será a protagonista encargada de vivir situacións pouco habituais para ela e transmitir as súas sensacións para achegar os espectadores á súa realidade.
O primeiro programa tratará de cumprir un dos soños de Corina: voar en avioneta, e non só iso, senón que tamén a pilotará ela mesma. O equipo desprazarase ata o Real Aeroclub de Santiago de Compostela, na Lavacolla, onde a protagonista coñecerá a Brais Gil e Samuel Campañó, que soñan con ser pilotos comerciais e falarán con ela da súa paixón mentres coñecen a avioneta na que vai vivir esta experiencia.
Corina contará tamén coa axuda de Claudio Guridi, piloto experimentado avalado por moitas horas de voo, que lle dará as indicacións para poñer en marcha a avioneta e conseguir despegar. O traxecto desenvolverase entre A Lavacolla e a ría de Arousa, con Corina ao manexo dos mandos tamén na aterraxe.
Finalmente, o director e presentador do programa, X. H. Rivadulla Corcón, entrevistará a Corina para coñecer cales foron as súas sensacións e que foi o que lle achegou esta nova experiencia.
Fuente Crtvg.es
