![](https://i0.wp.com/www.crtvg.es/files/web/CLAC1Rec.jpg?w=696)
Santiago, 17.05.2021.- O cinema galego será o protagonista de ‘Clac’, o novo espazo que a Galega vai estrear o 21 de maio, e cuxo lanzamento pon o ramo á programación especial con motivo das Letras Galegas, que leva ofrecendo a canle pública durante este mes.
‘Clac’ emitirase na G2 cada venres ás 23:00 horas e estará presentado e dirixido pola xornalista Tania Fernández Lombao. Realizado no estudio 5 de San Marcos, ‘Clac’ contará, amais, coa colaboración do experto en cinema e compañeiro dos medios públicos galegos Eduardo Galán. En cada edición desenvolverase un coloquio con membros do equipo da película seleccionada, duns 30 minutos, e despois da conversa emitirase a película.
Na súa estrea, ‘Clac’ estará dedicado a adaptación cinematográfica da obra máis emblemática de Eduardo Blanco Amor, ‘A Esmorga’. Para achegarse as reviravoltas desta produción de éxito, conversarán no programa o director da cinta, Ignacio Vilar, e a actriz Sabela Arán, que formou parte do elenco principal. ‘A Esmorga’ conta as traxicómicas peripecias do Cibrán, o Milhomes e o Bocas, interpretados por Miguel de Lira, Karra Elejalde e Antonio Durán ‘Morris’, nunha noite de bebedela polos arredores de Auria, a cidade literaria coa que Blanco Amor reelaborou desde a distancia do exilio o seu Ourense natal.
‘Clac’ irá combinando, nas sucesivas entregas, estreas cinematográficas con longametraxes galegas xa ofrecidas pola TVG. Con esta nova proposta, a Galega busca achegar os profesionais do cinema á audiencia, para permitirlles explicar os seus traballos, as súas pretensións e ofrecer un contexto sobre as películas que se proxectan, así como amosar o lado máis humano do cine.
Ademais do coloquio e a proxección da película, o espazo incluirá unha sección con información da actualidade cinematográfica e da carteleira.
Fuente Crtvg.es