Santiago, 28.03.2020.- O programa de entretemento dos sábados á noite na TVG, ‘Bamboleo’ (22.00 h), adáptase á situación e fai un especial de máis de dúas horas de duración cun eixe único: o divertimento en tempos de crise. Con música, con humor e conexións vía telefónica, skype, WhatsApp, etc, é dicir, coa técnica ao servizo da tele.
Xosé Manuel Piñeiro estará á fronte dun fantástico equipo de colaboradores: Tamara, Damián, Claudio e o terremoto da Estrada: o grandísimo Isi. Todos eles, sentados en butacas e gardando as distancias de seguridade.
Neste especial ‘Bamboleo’, conectarase coas cabezas visibles de algunhas das orquestras máis emblemáticas de Galicia, como son Los Satélites e Cinema. Con eles xogarase, farase historia e comentaranse anécdotas que ata agora parecían insuperables.
Artistas de primeira liña, como David Civera e Merche, compartirán con ‘Bamboleo’ as súas últimas vivencias e xogarán os xogos máis divertidos do programa.
E, como o cortés non quita o valente, rematarase o ‘Bamboleo’ coa sección máis sexy: ‘A ITV do amor’. Será amor entre distancias de seguridade e bicos virtuais, pero sen dúbida será “Amor con humor”.
Fuente Crtvg.es
