Santiago, 12.06.2020.- Volve a Liga de Fútbol e ‘Galicia en goles’ desprega o mellor equipo humano e técnico para contar a primeira das once xornadas da recta final dos campionatos na primeira e segunda divisións. O venres, ás 20:30 h, Paco Santos conduce a primeira edición ata as 23:59 horas, coa análise dos partidos dos equipos galegos na fin de semana e o seguimento ao que está pasando nos seis partidos do día.
O sábado, desde as 15:00 h e ata as 23:59 horas, Xoán Galán dirixe o equipo que trasladará a emoción de dous encontros nos que participan os nosos equipos. Na primeira división, o Celta recibe en Balaídos ao Vilarreal. Roberto Carlos Carballo encargarase da narración, co apoio nos comentarios técnicos e tácticos de Moncho Carnero e Víctor López. Mentres, Gonzalo Alonso irá percorrendo distintos centros onde se van xuntar as peñas para seguir os noventa minutos de xogo.
Á mesma hora xoga o Lugo no Sardinero, ante o Rácing de Santander, na Segunda División. Andrés Vieites trasladará á audiencia todo o que pase no partido, mentres Raúl Villares estará na cidade das murallas pulsando a opinión dos seareiros que se congregarán en locais públicos para animar na distancia ao seu conxunto.
Despois dos dous partidos, o ‘Galicia en goles’ retransmitirá as comparecencias dos adestradores, que se producirán de xeito virtual coas preguntas dos xornalistas a través dunha plataforma en liña e abrirá os micrófonos aos especialistas para debater no faladoiro dos resultados do Celta e do Lugo.
No último treito, o programa centrarase no Mallorca-Barcelona, que afecta directamente o Celta na pelexa pola permanencia na máxima categoría.
Xa o domingo, tamén a partir das 15:00 horas, a emoción da xornada pasará por Riazor, onde Javi Torres contará o Deportivo-Sporting de Xixón, que aínda sen poder ter público nas bancadas foi declarado de alto risco. César Méndez e Xosé Manuel Traba ocuparanse da análise do xogo que despreguen os futbolistas de Fernando Vázquez. Tras as comparecencia dos preparadores, o programa dedicará un faladoiro ao partido da Coruña e tamén a todo o que sucedeu durante a fin de semana.
A última hora do domingo complétase coa emisión de ‘Ao contraataque’, espazo en que Pedro Pablo Alonso abrirá mesa de debate cos xornalistas Víctor López, Javi Torres, Toni López e Millán Gómez, xunto ao adestrador Peli Cantoná.
Todos os programas da Radio Galega chegan a través da FM, TDT, radiogalega.gal, aplicacións como Radioplayer España e polo altofalante Alexa. Ademais, no caso do Celta-Vilarreal, os oíntes poden escoller a opción de audio Radio Galega a través do seu operador televisivo para combinar a imaxe do partido coa narración na nosa lingua.
Fuente Crtvg.es
