Santiago, 24.07.2021.- Na tarde do 25 de xullo, arredor das 17.30 h, a Televisión de Galicia estreará un documental sobre o conxunto de reformas da capela maior da catedral de Santiago de Compostela, que tiveron lugar durante estes últimos anos e que concluíron hai uns días cos traballos finais de iluminación.
A Fundación Catedral leva realizadas, a través do plan director, desde a súa constitución en 2008, preto de 100 intervencións principais. Este Ano Santo Xacobeo a catedral loce as súas mellores galas. Por primeira vez na súa historia de case un milenio, pódense contemplar todas as fachadas e torres da catedral de Santiago resplandecentes, coa cor orixinal da pedra, libres da capa agrisada que as murchaba.
Pero quedaba pendente algo fundamental: a restauración da capela aior e o cruceiro, o centro mesmo da catedral. O documental ‘Os segredos da capela maior’ revelará a grandiosidade dun dos conxuntos máis importantes de Occidente, agochado durante séculos baixo densas capas de humidade e po que ocultaban o seu fulgor de prata e ouro.
Durante varios meses, un equipo de profesionais de Televisión de Galicia, dirixidos por Senén Bernárdez, seguiron os traballos de intervención na capela maior, que ocultaba grandes segredos baixo a deterioración debida ao paso do tempo e, moi especialmente, á humidade e á choiva. Neste programa especial desvelaranse moitos destes segredos. Así, o espectador poderá coñecer a historia e o significado da capela maior e, ao mesmo tempo, seguir os apaixonantes e complexos traballos realizados para a súa restauración.
A catedral de Santiago, construída sobre as reliquias do Apóstolo, foi mesturando ao longo dos séculos diferentes estilos artísticos, como o románico, o gótico, o renacemento e o barroco. Estes estilos entrelázanse con harmonía e o seu corazón é a capela maior, un bo exemplo desta mestura.
Fuente Crtvg.es
