Santiago, 29.04.2023.- O grupo Efecto Pasillo, artífice éxitos como ‘Pan y mantequilla’ e ‘No importa que llueva’, é a estrela do ‘Bamboleo’ deste sábado. Os canarios regresan ás súas orixes no seu novo disco, ‘Los reyes del mambo’. A banda participará en xogos do programa, como o ‘Sobes ou baixas’, que hoxe ten veciños do Grove como protagonistas.
Esta noite, o espazo da Televisión de Galicia contará ademais coa visita dun artista de Vimianzo, DJ Rokiño, e dun dos cantantes máis punteiros da verbena galega, Diego Moreira, que estará presentando o tema ‘Coa que traio’.
A verbena galega vai estar presente no escenario do ‘Bamboleo’ coas actuacións da orquestra Finisterre. No tempo dedicado ao baile profesional, Luciano e Verónica, dous bailaríns de Pontevedra, deleitarán cunha demostración de zouk, unha derivación da lambada.
‘A Jrileira’ contará coa participación da Comisión de Festas de Santa María da Guía de Randufe, en Tui; a comisión de Oza, en Teo; a comisión de Santa Mariña de Pesqueiras, en Salvaterra de Miño, e a comisión cultural Santa María do Campo e San Roque, en Ribadeo. Das semifinais sairán dúas comisións gañadoras que se medirán, en primeiro lugar, ao karaoke co tema ‘Bandido’, de Azúcar Moreno, para despois adiviñar o maior número de intérpretes en minuto e medio de tempo.
Claudio Pan e Isi regresarán coas súas achegas semanais e, xa na parte final do programa, chegará a sección máis picante do ‘Bamboleo’, ‘A ITV do Amor’, cunha parella de namorados que intentarán despistar un participante de público. E unha gran novidade: a reincorporación ao programa de Lucía Regueiro.
Fuente Crtvg.es
