Santiago, 26.5.2022.- Esta fin de semana rematan as ligas regulares de fútbol na Segunda Profesional e na Primeira RFEF e comezan as semifinais do campionato de hóckey sobre patíns. A Radio Galega contará todo que suceda cun total de 24 horas de programación, repartidas entre o venres, o sábado e o domingo.
O ‘Galicia en goles’ do venres estará centrado no palacio dos deportes de Riazor, onde o Liceo vai disputar o primeiro partido da semifinal da liga de hóckey sobre patíns. O segundo encontro xogarase o domingo ás 12 e tamén terá presenza na edición matinal.
O sábado, desde as 3, o fútbol será o protagonista. O Lugo pecha a temporada na Segunda Profesional fronte ao Málaga, no Anxo Carro. E na última xornada da Primeira RFEF, o Celta B depende de si mesmo para acceder á fase de ascenso, sempre que gañe na visita á SD Logroñés. Mentres, o Deportivo e o Rácing de Ferrol preparan as finais xogando na casa partidos intranscendentes, ante o Unionistas de Salamanca e o Dux Madrid, respectivamente.
O domingo ás 12, ademais do Liceo-Noia, ‘Galicia en goles’ contará os cuartos de final da Copa de campións de fútbol xuvenil: Betis-Celta e Atlético de Madrid-Deportivo. A partir das 3, o interese estará nos torneos de fútbol base en Ribadumia e Boiro, xunto ao Umia-Barbadás, da Preferente, e o Rioja-Cangas, da liga de balonmán.
Na fin de semana, a Radio Galega emite tamén o programa ‘Convivir deportivo’, desta volta dedicado ao Club Deportivo Vilar de Barrio.
Fuente Crtvg.es
