Santiago, 09.01.2020.- O programa ‘Segredos – Desmontando Galicia’ dedicado á Coruña, producido por MBC Audiovisuales para a TVG e dirixido por Marcos Barrios, converteuse no primeiro gañador do Premio Cronista Emilio Quesada, convocado pola Asociación da Prensa da Coruña (APC).
Este certame, que celebra este ano a súa primeira edición, ten como obxectivo resaltar os valores históricos ou actuais da cidade da Coruña, das súas institucións ou dos seus habitantes. Recibe o seu nome debido a que a dotación de 1.000 euros que leva prodúcese grazas á doazón de Emilio Quesada Zato, o xornalista máis veterano da Asociación da Prensa, que formou parte dun xurado que considerou que esta peza, emitida pola canle autonómica galega o pasado mes de outubro e dispoñible na súa web, representa á perfección os valores que o certame pretende transmitir e potenciar.
O premio, que será entregado polo propio Emilio Quesada o próximo 24 de xaneiro, no transcurso da celebración anual do patrón dos xornalistas, data icónica para a Asociación da Prensa da Coruña, será doado a unha institución benéfica, segundo manifestou o director da Área de Contidos da TVG, Fernando R. Ojea.
Estreado o pasado mes de outubro, o espazo ‘Segredos – Desmontando Galicia’, presentado por Diana Nogueira, Alicia Burton e Quique Morales, trata de descubrir os segredos das grandes infraestruturas e do patrimonio natural, urbanístico e cultural galego desde o punto de vista do entretemento. Con esta proposta innovadora, a Televisión de Galicia pretende axudar a entender os xeitos de vida da nosa terra e a súa evolución sen límites espaciais e temporais grazas ás integracións 3D.
Fuente Crtvg.es
