Santiago, 10.04.2021.- Dúas longametraxes participadas pola Televisión de Galicia alzáronse este sábado cos principais galardóns na gran festa do audiovisual galego. A gran triunfadora da XIX edición dos Premios Mestre Mateo da Academia do Audiovisual foi a longametraxe ‘Ons’, de Alfonso Zarauza, con nove galardóns, seguida por ‘A illa das mentiras’, de Paula Cons, con cinco.
A gala, presentada pola actriz Lucía Veiga, unha das facianas á fronte do noticiario de humor ‘Malicia Noticias’ na canle pública, foi emitida en directo pola TVG e a Radio Galega hoxe á tarde, desde o Teatro Colón da Coruña.
Ademais, o comunicador da Televisión de Galicia, Rodrigo Vázquez, copresentador do espazo das tardes da Galega ‘Quen anda aí?’ foi elixido mellor comunicador de televisión. E o programa “Cos pes na terra”, emitido pola canle pública, gañou na categoría de mellor realización.
‘Ons’ recolleu nove premios nas categorías de mellor longametraxe, mellor intérprete feminina e mellor intérprete feminina de reparto, mellor intérprete masculino, mellor montaxe, mellor son, mellor dirección de fotografía, mellor guión e mellor dirección de produción. E ‘A illa das mentiras’, de Paula Cons, recolleu cinco Mestre Mateo á mellor dirección, mellor intérprete masculino de reparto, mellor dirección de Arte, mellor maquillaxe e perruquería, e mellor vestiario.
Pola outra parte, a categoría de mellor documental tamén recaeu nunha produción apoiada pola TVG, “Nación”, de Margarita Ledo, cinta que foi estreada o pasado mes de marzo.
Este ano, o premio de honra Fernando Rey foi para o actor, dramaturgo, director teatral, tradutor e docente Manuel Lourenzo.
Fuente Crtvg.es
