Santiago, 05.11.2021.- Nova fin de semana deportiva nos medios públicos galegos, que comeza o sábado cunha tripla oferta futbolística. Ás 16:30 horas, a G2 e a web da CRTVG ofrecerán en directo o C. D. Arenteiro-C. D. Palencia Cristo Atlético, partido correspondente a décima xornada da Segunda RFEF. Ambos os dous precisan o triunfo se queren afastarse do desastre e asegurar a salvación ao final da tempada.
Ao remate desta cita, tomaralle a remuda, ás 18:30 horas, un encontro feminino do deporte rei na xornada 8 da categoría de prata, entre o R. C. Deportivo Abanca e o Athletic Club de Bilbao B. O conxunto de Miguel Llorente, que aínda non coñece a derrota, recibirá en Abegondo un filial que ocupa o undécimo posto da táboa.
A maiores, ás 20:50 horas, poderase ver en directo un novo partido destacado da 13ª xornada da liga francesa, que enfrontará o F. C. Girondins de Bordeaux co PSG F. C. no estadio Matmut Atlantique.
Na xornada do domingo os encontros de fútbol compartirán protagonismo co motocrós, xa que a G2 volverá achegar unha nova proba do Campionato do Mundo, en que se poderá ver en acción o lucense Jorge Prado, que conserva a cuarta praza malia a súa lesión vertebral e tras protagonizar dúas boas mangas no circuíto de Pietramurata. Toda a emoción desta 17 proba do MXGP de Lombardía poderá seguirse, en directo, ás 12:00 e ás 15:00 horas.
O fútbol de 2ª División volverá pola tarde, ás 19:00 horas, aos medios públicos galegos, co partido que disputarán Arousa S. C. e U. P. Langreo. E a partir das 21:00 h, retransmitirase en diferido un novo partido da liga portuguesa de fútbol, o C. D. Santa Clara-Porto F. C., correspondente á décimo primeira xornada da Primeira Liga.
Fuente Crtvg.es
