Santiago, 15.09.2022.- O ‘Galicia en Goles’ da Radio Galega comeza as emisións desta fin de semana na noite do venres para analizar cos protagonistas os partidos máis atractivos do calendario. Ata as 00.00 h, Paco Santos falará con xogadores e adestradores, ademais de ofrecer as comparecencias ante a prensa máis destacadas das últimas horas.
O sábado, o programa volve adiantar o comezo ás 13.00 h para retransmitir o partido da Segunda División Profesional entre o Vilarreal B e o Club Deportivo Lugo. A derrota ante o Alavés no Anxo Carro non impide que o equipo galego viaxe con optimismo ata a cidade deportiva de Castellón, xa que nos anteriores desprazamentos foi quen de empatar en Tenerife e gañar en Zaragoza.
Pola tarde, o protagonismo será para a liga de Primeira División, cunha ampla cobertura desde Mestalla do Valencia-Celta de Vigo. Os dous equipos perderon a xornada pasada e no cadro galego aínda proe o 4-1 encaixado ante o Atlético de Madrid no Metropolitano.
Durante o programa tamén haberá unha atención especial ao Rácing de Ferrol-Cultural Leonesa, da Primeira RFEF. Non en van, o cadro departamental é o colíder da categoría xunto ao Córdoba, sumando tres vitorias en tres xornadas.
Na última hora, o ‘Galicia en Goles’ recollerá no espazo #GaliciaEnXogo a información do motor e o seguimento aos deportistas galegos que preparan os Xogos Olímpicos de París 2024.
Xa o domingo, a edición matinal principiará ás 11.45 h, co encontro de Primeira RFEF entre o Ceuta e o Celta B. Pola tarde, desde as 15.00 h, o Deportivo-Pontevedra centrará o interese da xornada desde o estadio municipal de Riazor. Antes xogarase a xornada de Segunda e Terceira RFEF, con prioridade para o enfrontamento entre o Ourense C. F. e o Compostela.
Ao remate da xornada, ‘Galicia en Goles’ ampliará a súa emisión dominical ata as 01.00 h, primeiro co faladoiro de especialistas de ‘Ao Contraataque’, ás 23.00 h e, a partir das 00.00 h, coa análise en profundidade da xornada na Terceira Federación.
Fuente Crtvg.es
