A través de diferentes olladas, os espectadores verán a evolución da súa traxectoria deportiva, da súa repercusión social e da vida dos seus remeiros
Santiago, 3.5.2022.- A segunda canle da Galega estrea este martes ‘Maraxe’ (23.30 h), un documental de Pablo Chouza que conta os 40 anos de historia do Club de Remo de Cabo da Cruz, amosando o amor cara a un deporte, o amor cara a un pobo e o amor cara a un xeito de vida.
A historia do Club de Remo Cabo da Cruz é a historia do remo de Galicia. Fundado en 1979, tivo desde a súa creación multitude de trabas no seu camiño para saír adiante. Hoxe é un referente do remo nacional. A través de diferentes olladas, os espectadores verán a evolución da súa historia, da súa traxectoria deportiva, da súa repercusión social e da vida duns remeiros que compiten, sen selo, como profesionais na liga máis esixente do mundo en banco fixo.
A través dos testemuños de máis dunha trintena de persoas, Chouza recolle os máis de 40 anos de vida dun club de remo que, por enriba dos seus logros deportivos, crea comunidade e establece vínculos de unión que transmiten un xeito de vivir.
Fuente Crtvg.es
