Santiago, 18.10.2021.- A Radio Galega continúa afondando na súa estratexia de conectar cos novos xeitos de consumo a través das diferentes plataformas e esta semana ofrecerá en directo polas súas canles dixitais -radiogalega.gal e a aplicación móbil da CRTVG- a realización de tres novos programas que posteriormente se ofrecerán a través das ondas.
Un deles é ‘Convivir Deportivo’, presentado por Alfonso Pardo, que este luns, a partir das 13.00 h, gravará en Boimorto un programa de homenaxe a Ánxeles Barreiro, unha das mellores atletas que deu Galicia e a primeira muller que superou os 60 metros en lanzamento de disco. Grazas a ela internacionalizouse esta disciplina, xa que ata a súa irrupción as marcas eran moi discretas. Olímpica en Barcelona 92, leva máis de dez anos loitando contra o párkinson.
Ánxeles estará acompañada de parte da súa familia, do seu adestrador e descubridor, Raimundo Fernández, e do presidente da Federación Galega de Atletismo, Isidoro Hornillos.
O xoves 21 de outubro, ás 19.00 h, ‘Convivir Deportivo’ repite saída e emisión en directo polas canles dixitais da Radio Galega. Nesta ocasión, o destino será Ponteceso, onde se falará dos seus clubs de fútbol e de fútbol praia. O programa estará dedicado a Ramiro Amarelle, considerado un dos mellores xogadores de fútbol praia do mundo, que é natural desta localidade.
Ese mesmo día e nese mesmo lugar, pero un pouco antes, ás 17.00 h, o programa ‘Mar de Ardora’ realizará unha edición especial dedicada á tradición mariñeira de Corme. O seu presentador, Xusto López Carril, falará con tres vellos lobos de mar da zona, un percebeiro, un mariño mercante e un pescador de altura, tres persoas moi veteranas que representan o vivir mariñeiro de Corme no último século.
Fuente Crtvg.es
