Santiago, 04.04.2021.- Tres documentais apoiados pola Televisión de Galicia, ‘Entre lobos e pastores’, ‘A poeta analfabeta’ e ‘Negro púrpura’, participarán a semana que vén na MICE, a 16ª Mostra Internacional de Cinema Etnográfico, organizada polo Museo do Pobo Galego, que se celebrará do 6 ao 10 de abril en Santiago de Compostela.
Na sección oficial competirá ‘Entre pastores e lobos’, de Ibis Audiovisual, un documental dirixido por Manuel Pedrosa que supón un percorrido pola memoria para achegar o espectador á natureza salvaxe e asomalo á complexidade dos ciclos naturais das montañas. Presenta a investigación de Pedro Alonso, un biólogo experto no estudo do lobo ibérico, que leva máis de 30 anos tras a súa pegada intentando comprendelo, acumulando ás súas costas milleiros de quilómetros percorridos por camiños e pistas dos montes de Galicia. Esta película, que se rodou durante cinco anos no Macizo Central, tivo a súa premiere na 27 edición do Suncine Environmental Film Festival de Barcelona en novembro de 2020. Alí obtivo dous galardóns: o premio do público e o premio Cine Sostible.
Tamén se exhibirá na sección oficial ‘A poeta analfabeta’, un filme documental, dirixido por Sonia Méndez, que retrata unha muller fascinante: Luz Fandiño, poeta, activista, feminista, nacionalista e revolucionaria. Aos seus 89 anos, Luz é testemuña viva das realidades máis duras do século XX, por ser muller, por ser emigrante, por ser pobre e pola súa ideoloxía. Luz é unha muller brava, unha persoa fondamente política e un ser cunha humanidade excepcional. ‘A poeta analfabeta’ explica como entende o mundo esta poeta que, a pesar do tremor das mans, escribe todos os días, que a move a tal esforzo e que a mantén viva.
A película inaugural da MICE, fóra da competición oficial, será ‘Negro púrpura’, que retrata a Galicia do século XX a través do cláviceps purpúrea, un fungo alucinóxeno que agroma nos cereais e que abre as portas a unha historia tan curiosa, sorprendente e descoñecida como importante no devir da nosa cultura e da economía dunha época. Este documental, dirixido por Sabela Iglesias e Adriana P. Villanueva, viaxa no tempo para contar a historia deste fungo que ten tanto de fascinante coma de real e que acontece na dualidade de mundos contrapostos: a vida e a morte, a sabedoría popular e a ciencia, a economía de subsistencia e a industria internacional, a relixión e a psicodelia.
A Mostra Internacional de Cinema Etnográfico naceu en 2006 e deseñouse como un evento do Museo do Pobo Galego para dar a coñecer os traballos audiovisuais relacionados coa etnografía e a antropoloxía, disciplinas científicas en que se enmarca o traballo do Museo. A MICE, que este ano ofrece unha edición mixta, con varios dos contidos dispoñibles en presencial e en liña, pretende xerar un espazo de diálogo, de reflexión e de intercambio arredor da confluencia entre a antropoloxía social e cultural e a teoría e a práctica cinematográfica.
Fuente Crtvg.es
